O i latou ua falepuipui nei na molia i moliaga o le faomea ma le gaoi ina ua latou osofaia se fale o se tamā i Vaitele i le tausaga na se’i mavae atu nei.
I lipoti a leoleo na osofai e i latou ia le fale o se tamā 51 tausaga le matua i Vaitele a o tofafā lea tamā ma lona aiga.
E lata i le $20 afe le aofaiga o meatotino ma se tinoitupe na gaoia e i latou ia.
I faamaumauga a le faamasinoga, na toe mafai ona toe maua isi meatotino ae o isi meatotino e lei mafai ona toe maua.
O le itu na silasila ai le faamasinoga e ogaoga ai gaioiga a ia alii, o le taimi na o latou osofaia ai le fale o lē na tagi, o le soligatulafono sa fuafua lelei lava, o le tauaofai o le seleni e maua mai ia meatotino na gaoia.
Mo le silafia o loo maitauina le faatupulaia o ia soligatulafono, ma na faailoa manino e le Komesina o Leoleo o Auapaau Logoitino Filipo o le mafuaaga ona o le taugata o le soifuaga faapea ai ma le tagofia o fualaau faasāina.
Ma o se tulaga o loo faapopoleina ai le Matagaluega ma e tatau ona foia a o lei amatalia aloaia le fonotaga a taitai o Malo o le Taupulega lea o le a faia ia Oketopa o le tausaga nei.
E tai 2 tausaga ua faasala ai i le falepuipui i latou ia.
