E 14 tausaga ua faafalepuipui ai lē sa faigaluega i le itu o ato i le malaevaalele i Aukilani ona o le aumai faananā o fualaau faasāina.
O Me o le 2020 na taofi ai e le vaega o tiute le pasese na sau ma le 19.4 kilokalama o methamphetamine i lana atopa’u, ma e faatusa le tau o pauta nei i le oo atu i le $8 miliona.
O lē ua faafalepuipui, 47 tausaga le matua o ia lea o le tagata autu na fuafuaina le taumafai e nanā le atopa’u i le faatoa taunuu o le tagata malaga, ma o le taimi foi lea o loo tapunipuni tuaoi ona o le Koviti.
O suesuega nei na maua ai lē ua faafalepuipui, o lea na tuliloa lava e leoleo feau tusitusia i luga o telefoni ma o faamaoniga foi nei na iloa ai faatonuga na ave agai i le tagata lea e gafa ma ato i le malaevaalele e faalafi le ato o loo iai aisa peitai e lei mafai ona sao ona o lea na faatali atu e leoleo.
