Ua amata tuli le fa’asalaga i le falepuipui o se ali’i ua 31 tausaga o lona soifua ina ua faamaonia lona ioeina o le moliaga o le ave taavale fa’atamala na mafua ai ona lavea le taavale a le Pulega o le Suavai sa galue ai, ma fano ai le soifua o se tagata faigaluega o lea auaunaga a le malo, ae o sana uo mamae i le galuega e pei ona ia faailoa i le faamasinoga.

O Tovi’o Eliepa o Salelologa ua 10 tausaga o galue i le pulega o le suavai, ae o se galuega a le pulega na agai ai i le Itu o Tane ia Oketopa o le tausaga ua mavae na aafia ai le taavale i se faalavelave ina ua lalata atu ile afioaga o Pu’apu’a.

Advertisement

Fa’aalia e leoleo i ia latou su’esu’ega na tifa i tua le taavale ma fetoai ai ma se pou eletise ma o le itu agavale i totonu i le nofoa pito i luma sa nofo ai lē ua maliu na aafia tonu i le faalavelave. E to’atolu isi tagata faigaluega sa malaga faatasi ai ma le ave taavale ua molia e leoleo.

O le fa’aiuga tusitusia a le faamasinoga ua fa’ailoa ai na tautulimoe lē ua molia a o ia faafoe le taavale le mafua’aga o le faalavelave. O lē na maliu i le faalavelave o se tama 46 tausaga o le soifua ma o i la’ua ma lē ua molia e mai le afioaga o Salelologa.

O le ioeina e Tovio o le moliaga, faia o le ifoga i le aiga o lē na fano le soifua, faato’a tulai lea i le faamasinoga i se solitulafono, o ona itu lelei ia i le silasila a le faamasinoga. Faaopoopo iai ma tautinoga i le tautua lelei ile aiga, le nuu ma le lotu na faatāua ile iloiloina o se fa’asalaga.

I le tolu tausaga na amata ai le fua o se faasalaga o le lua tausaga ma masina e lima ua to’esea ma totoe ai le fitu masina ua nofosala ai i le falepuipui. Ua faaopoopo i le faasalaga ma le 12 masina ua poloa’ina lē ua nofosala e tapu ma faasā ai ona toe aveina se taavale.

O lona uiga e lē mafai ona ia toe umia se laisene ave taavale. O le afioga i le tamaitai faamasino sinia o le faamasinoga maualuga le afioga Leutele Niava Mata Tuatagaloa na fa’atautaia lenei mataupu tau faamasinoga ma aumai ai lana faai’uga i le Aso Faraile ua mavae.