E to’afā ni alii ua ta’i 20 ma ona tupu tausaga le matutua, ua faasala i le falepuipui ina ua faamaonia lo latou moliaga o le fasioti tagata pa’ivalea.
O Fepuari o le tausaga e 2018 i Faleasiu na tulai mai ai le solitulafono na faaoo ai e i latou ia e to’afā ni manu’a i se gaioiga na latou auau faatasi e faatino, ma afaina ai le ulu ma le fatafata o lē ua maliu, o ia lea o Payne Fesola’i o se tamā 44 tausaga le matua, ua faaipoipo ma ua fai le fanau.
O Puka Wesley Upu e 4 masina lona faasalaga, o Faasipa Matuu e 8 masina, Milo Lilomaiava e 3 masina ma le alii o Peato Upu e 8 masina ua nofosala ai i le falepuipui.
E eseese le maualuga o tausaga na fua iai faasalaga a le faamasinoga mo i latou ona e eseese a latou gaioiga i le faatinoga o le solitulafono, ma ua toesea ai nisi o masina ona ua salamō mai le gaioiga na latou faia faatasi, i le ma le isi vaega tāua sa faasala e le nuu, ma faia foi ifoga i le aiga o lē ua maliu.
