E faitau selau tagata o loo nonofo i totonu o taavale e ui i le mālūlū. I le faai’uga o le 2017, mai ia i latou na faatalosaga i le matagaluega a le Social Development mo se fesoasoani, o le 108 na faailoa o loo nonofo i totonu o taavale, peitai, o le masina talu ai na faamauina ai ua alu i luga i le 480.
Mai le Lifewise Youth Housing i tala a le TV1, o se tala faanoanoa ma e ono lē sa’o foi lea faitauga ona o le to’atele o fanauiti o loo nonofo ma tagata matutua nei i totonu o taavale e lē o tauina ai.
O nisi o tupulaga ua faailoa e saogalemu atu le nofo i le taavale na i lo faletalimalo o loo ofo mai e le malo.
Ae fai mai le minisita lagolago o fale, Marama Davidson, o le alu i luga o faamaumauga e iai se vaega e mafua mai ona ua lelei auala o loo lipotia ai nei faamaumauga.
O faamaumauga foi nei o loo maua e le matagaluega mai tagata o loo agai atu e faatalosaga mo fale a le social housing. Ua tuua’ia ai e le ta’ita’i o le National, Christopher Luxon le malo.
