O se tasi lenei o fuafuaga ua mae’a faailo i le fonotaga a le Faalapotopotoga tau Tagata Tafafao Maimoa mai Fafo a le Pasefika, le South Pacific Tourism Organization (S.P.T.O.) ma le Ofisa o Polokalame tau le siosiomaga i le Pasefika le Secretariat of the Pacific Regional Programme.
O lenei fuafuaga ua faipaaga ai nei faalapotopotoga e pei ona faamauina i le fonotaga a le S.P.T.O. i Tahiti e unaia ai pea le taofia o le toe faaaogāina o le pepa uga poo le plastic i auaunaga tau turisi i le Pasefika e aofia ai fale e nonofo ai turisi, o vaiinu ma meaai taumafa, o luga o vaa ma femalagaa’iga i vaalele.
O lenei taumafaiga o se vaega o le poloketi o loo faatupeina e le Malo o Ausetalia ua ta’ua o le Pacific Litter Project.
Saunoa le Ofisa Sili o le S.P.T.O. Christopher Cocker, “o lenei faigapaaga o loo ogatasi lea ma fuafuaga o atinae tau turisi faaauauina ma o lenei mataupu o loo aafia tele ai le tamaoaiga aemaise le siosiomaga o le Pasefika.”
Faailoa foi e le Sui mai le vaega o le Puleaina Lelei o Otaota ma Lapisi a Ofisa le S.P.R.E.P. Anthony Talouli, o lenei foi faigapaaga o se faailoga lea o le tuuina mai o le lagolago a nisi o faalapotopotoga a le Pasefika e galulue faatasi e tuuitiitia le aafiaga o lenei mataupu i le Pasefika.
“O le Pasefika o se tasi o nofoaga e tuli tele e turisi mai fafo ae o le mataupu lenei o le faaaogāina pea o le plastic ua avea ma se tasi o faafitauli ma o lenei faigapaaga o le a galulue ai e faatino puipuiga o le siosiomaga o le Pasefika mai le taofia o le toe faaaogāina o plastics.”
O le amataga o le tausaga fou o loo fuafuaina e amatalia ai le faatinoina o lenei faamoemoe.
