E tolu tausaga ua faipaaga ai nei le pulega o le taaloga lakapi i lo tatou atunuu le Lakapi Samoa, ma se auaunaga o faasalalauga i luga o fesootaiga televavave e ta’ua o le Spark Sport.
O lea faiga paaga ua faamautu ma o le taaloga faitaulia poo le test match muamua a le tatou Manu Samoa 15 ma le ‘au a Italia i le aso 5 o le masina fou o Novema, o le a maimoaina ai e le lalolagi ma lo tatou atunuu e ala i lea tautua i faasalalauga.
O taaloga foi a le Manu Samoa e faia i atunuu e pei o Niu Sila, Amerika ma Iapani o le a faasalalau tuusao foi e le Spark Sport. Faaalia e le pulega o le Spark Sport, o le a le misia e le latou tautua taaloga faavaomalo uma a le Manu Samoa, a o sauni atu i le Ipu o le lalolagi e faia i Farani i le tausaga fou 2023.
Ua faailoa foi i se pepa o faasalalauga e le Ofisa Sili o le Lakapi Samoa le susuga Faleomavaega Vincent Fepuleai le faafiafiaina o le pulega o le lakapi a Samoa i lea laasaga fou i tapenaga o le Ipu o le lalolagi aemaise o le siitia maualuga ai o le lagolago a le atunuu i lana aulakapi.
