E faigata tele le tusiga o le suega faataitai o le NCEA literacy ma le numeracy a le New Zealand Qualifications Authority (NZQA) sa iai i le tausaga na te’a nei.

I faamaumauga o loo faailoa ai na lapatai e le matagaluega o aoga le pulega a le NZQA  e le i faigofie i nisi o fanau aoga ona malamalama i fesili o suega nei o le Matematika ma le Gagana Peretania.

O itu e le i faigofie o le faaupuina o nisi o fesili, o le tele o fesili atoa ai ma lona aotelega e le masani ai le toatele o fanau Maori faapea fanau Pasefika.

O le toatele o fanau na sue ai o i latou i le vasega 10 ma e 34% le maualuga o le pasi o le writing, 56% le pasi o le suega Matematika ma le 64% o le reading.

I ripoti a le leitio a Niu Sila o loo molimau ai le NZQA ua vaavaai nei e toe teuteu ma faaleleia atili le suega o lenei tausaga ma o loo galulue faatasi ai ma le matagaluega o aoga.