“O le faasamoa, talitonuga poo le faith, ma le aganuu faasamoa le Samoan culture, e le o ni ‘alofaga i le tutupu mai o sauaga i totonu o aiga.”

O le faamatalaina lea o le faiga faavae fou poo se policy a le Matagaluega o Leoleo, Falepuipui ma le Ola Toe Fuataina ua mae’a faalauiloa faalauaitele, ma le faamoemoe e tali atu ai i sauaga o loo tutupu pea ma aliali mai, ma aafia ai le soifua saogalemu o tagata, aemaise lava sauaga faalotoifale i totonu o aiga o le tatou atunuu.

O le faalauiloa ai o lea faiga faavae o se isi lea o laasaga i le agai i luma o taumafaiga e tetee atu i sauaga faalotoifale i aiga ina ia mautinoa le saogalemu ma le soifua lelei o tagata i totonu o se aiga i Samoa.

O le faiga faavae lenei ua mafai ona ausia i se galuega fai faapa’aga a le Matagaluega o Leoleo ma nisi o auaunaga e pei o leoleo o le malo o Ausetalia, le faamasinoga, le vaega o mataupu tau sauaga i le matagaluega o leoleo, ma le faalapotopotoga o le Toomaga mo ē Puapuagatia.

Ua faaalia i se pepa o faamatalaga faalauaitele o le faiga faavae fou lenei o le a matuā tutu’aai le auaunaga a leoleo e tali atu i soo se taimi e tulai mai ai ni sauaga i aiga, ma o se faiga faavae fou foi, o le a lē toe solomuli ai leoleo i le suesueina o se mataupu ma ave i le Tulafono, e tusa lava pe o le a iai se taumafaiga a lē na lipotia se sauaga e toe faaui i tua.

E manino mai i lea taumafaiga o le a lē toe iai se avanoa e teuteu ai se mataupu tau sauaga pe a oo i lima o le Tulafono.

O le tamaitai Komesina lagolago o leoleo le susuga Papalii Efo Moalele sa taulamua i le tapenaina o se faiga faavae mo le auaunaga o mataupu i sauaga i totonu o aiga a le matagaluega ma o se tasi lea o ana galuega o le fausia ia malosi ma ganea se fauga faavae e mulimulitai ai Malu o le Malo i le faatinoga o o latou tiute pe a tali atu i ni mataupu tau sauaga.