Ua feagai nei le auaunaga a le Buy now pay later a Ausetalia, poo le Faatau nei ae totogi mulimuli, ma nisi o tulafono fou ua faia e le malo e puipuia ai tagata faatau e faitau miliona o loo faaaogaina lea auauanga.

O tulafono fou ua faailoa i le asō o le a faafaigata ai i tagata Ausetalia ona faaaoga oloa mai le BNPL ona o nisi siaki fou ua fuafua e faia. 

Pe ā ma le 7 miliona tagata e faaaogaina auaunaga a le BNPL lea e aofia ai ma le Afterpay ma le Zip.

O lea faiga e faataga ai le aufaatau e faatauina oloa i le taimi lava lea ae togitogi i nai peimeni e faatulaga mulimuli ane.

Ua ta’ua i lipoti a le Alaata 9 sa iai lava popolega e ono oo tulaga faapea i ni luitau tau tupe pe afai o le a tetele aitalafu a tagata faatau ma lē mafai ona faaauau le togitogiina o oloa.

I lalo la o suiga fou ua faailoa o le a faatulaga ai nisi o ana oloa ma auaunaga o credit products e manaomia ai la ona ausia e tagata tuutuuga i lalo o le tulafono o le National Consumer Credit Protection ma tatau ona iai se laisene talafeagai faapea mo fefaatauaiga i Ausetalia.

Fai mai o lalo o ia suiga o le a tatau ai ona faamautinoa e le BNPL e mafai e le tagata faatau ona totogi le oloa a o lei ofoina iai.

O le a faatapulaa foi totogi mo peimeni e misi a tagata faatau ma faamalamalama atili ia tulaga a o lei saini le tagata i le auaunaga.