O le amataga o le vaiaso nei i se malaga a le Fiji Airways mai le malaevaalele i Nadi, na toe faafoi mai ai se tamaitai Samoa 24 tausaga le matua, e faapea mai se lipoti a le ofisa o leoleo i lo tatou atunuu, na saofia le malaga ese ma Samoa i se malaga a le Fiji Airways i le Aso Toonai o le vaiaso na tea nei a o lumanai le aso Kirisimasi i le Aso Sa.
O loo faia suesuega a le vaega o le puipuiga o le malaevaalele i Faleolo faapea isi auaunaga i le malaevaalele faavaomalo o le atunuu, pe na faapefea ona saofia le gaioiga a lea tamaitai e aunoa ma le iloa e se isi, aemaise sa tatau ona uia uma vaega manaomia mo se tagata malaga mo le siakiina e pei o le pepa o le nofoa i le vaalele ona faatoa mafai lea ona ulufale i le vaalele.
Ua faaalia e leoleo i se lipoti o loo faia foi a latou suesuega ma o loo faatali i le sailiiliga a le pulega o le malaevaalele e faamautu lelei ai ni mau e faia ai ni moliaga solitulafono.
Ta’ua i lea lipoti o nisi o le aufaigaluega i le malaevaalele i Nadi i Fiti na latou maua lea tamaitai o loo lafi i totonu o le faleui, a o faia a latou galuega i le faamamaina o ia nofoaga mo tagata malaga e afea lea malaevaalele i Fiti.
O le a maua se faamatalaga auiliili o lenei mataupu pe a faia le feiloaiga masani a tusitala ma le sooupu o le Matagaluega o leoleo i le vaiaso asau.
