I le savalia ai nei o le fa aso talu ona faamaonia e leoleo le maliu faafuase’i o le tamaitai pule o le faletelevise o le TV3, e pei ona maua i le taeao o le Aso Gafua e nisi na asia le maota sa faamautu ai le tamaitai, ua maliu, ua faailoa e le sui komesina o le matagaluega o leoleo susuga Papalii Monalisa Tia’i Keti, ua iai le faaiuga a le Pule o maliu poo le coroner e tatau ona faia se taotoga faapitoa e faamautu ai le mafuaaga o le fano o le soifua o le tamaitai o Aotearoa Pesamino Mayer.

O le taimi e faia ai lea taotoga faapitoa e le o mautinoa ona o lea ua tapena feuiuiaiga masani mo le aumaia o se fomai faapitoa mai le auaunaga a le matagaluega o leoleo i le atunuu o Fiti, e faatinoina lea tulaga.

Peitai ua faailoa e le sui komesina o le fomai faapitoa foi lea o le a faia taotoga mo isi tino maliliu e tolu e aofia ai le tamaitai leoleo na maliu i le vaitaimi o aso malolo o le kilisimasi, lea ua molia ai se alii i le solitulafono o le fasioti tagata faamoemoeina ma o loo nofo taofia i le vaaiga a leoleo i le taimi nei.

I le maliu o le pule o le TV3 ua faailoa e le sui komesina o le masina o Iulai o le tausaga nei, ua faatulaga e faia ai le suesuega o le maliu lilo poo le inquest i le faamasinoga faaitumalo.