O le lālā o Malo Aufaatasi mo polokalame o le atina’e le UNDP ua na aumai i Samoa se polokalame i le silasila mamao lea i le faaaogā i lo tatou atunuu o vaa ma taavale e alu i le eletise e avea o se isi auala o femalagaa’iga.
O le faamoemoe autu o lenei polokalame o le sailia lea o auala e taofia ai le toe faalagolago o Samoa i auala o feoaiga e faaaogā ai malosiaga tau suauu ma penisini.
O le Malo o Iapani o loo faatupeina le malaga mai i lo tatou atunuu o se aumalaga o sui o Malo Aufaatasi e iai tomai i malosiaga faafouina poo renewable energy latou te amata faatino se sailiiliga mo lea faamoemoe.
O se fuafuaga ua faatatauina ai se foai tupe e 15 tesimale 5 miliona tala Amerika e aumai i fesoasoani mo polokalame o suiga o le tau e faatino ai le faatutūina o ni nofoaga i Samoa e saogalemu ma fetaui ma taiala o puipuiga o le siosiomaga e fafaga ai le uila e ola ai taavale e alu i le eletise.
Ua iai foi le fuafuaga o le masina o Aokuso e malaga mai ai se tagata poto faapitoa mai fafo e amata se suesuega o le gataifale mo le faaaogāina o vaa e ola i malosiaga faafouina e aunoa ma le toe faaaogāina o vaa e utu i suauu ma penisini.
