Ua faalauiloa faalauaitele mai e le Komiti Faufautua o Faalavelave Matuia ma Faafusei i le atunuu o le a faia le tuiga tele o le KOVITI-19, mo Samoa, o le avanoa lea mo i latou uma e le’i mae’a fa’atinoina o latou tui puipui i le Aso Faraile 19 o Novema 2021.
O lenei galuega ua fuafua e amata i le itula e 8 i le taeao seia o’o i le 6 i le afiafi. Ma ua fautuaina foi le atunuu e le’o se aso malolo lea aso o le a tatala pea galuega masani faapea feoaiga i luga o auala tele.
Ua talosagaina foi le atunuu ina ia nonoa se faailoilo lanu mūmū i luma o maota ma laoa o aiga, fa’alapotopotoga po o pisinisi, pe afai o iai se tagata e mo’omia ona tui o se auala lea e faigofie ai le faatinoga o galuega a le Matagaluega.
O le taimi nei ua faamauina le oo atu i le 95 % o i latou ua maea tui muamua o le Astrazeneca ae ua 70% i latou ua maea uma tui puipui e lua.
