E tea le fitu i le afiafipo o le Aso Gafua ananafi i Samoa ae maua le fesootaiga i le faauluuluga o le faalapotopotoga o vaa ma ia faailoa mai ai, o loo galulue e tau aveese mai se tasi o vaa o le faalapotopotoga ua pa’ulia i se vaega o le gataifale o Salelologa lata i le ava o loo uia e vaa tetele o le faalapotopotoga o loo femalaga’i i le va o Upolu ma Savaii.

O le malaga atu o le vaa o le SSC Fasefulu i Savaii mai le uafu i Mulifanua na tupu ai le faaletonu ae ua lē o toe mamao ma le uafu i Salelologa.

Na ave ai uta o taavale ma le pasese ae na la’u ane le pasese e ni vaa laiti i uta, ae na o uta ma taavale sa iai i luga o le vaa.

E lē o iloa le mafuaaga o le faaletonu ae e auina atu lenei lipoti e lei toe maua mai se faamatalaga po ua manuia galuega anapo i le aveesea o le vaa ma le vaega na pa’ulia ai.

E pei ona silafia o se vaega foi o le gataifale o loo iai le uafu i Salelologa na pa’ulia ai le vaaleoleo o le Nafanua II, lea na mafai ona aveesea ae ua telē le faaletonu, o le mafuaaga o le toe fau ma faatupe e le Malo o Ausetalia o se isi vaaleoleo mo Samoa, lea e taunuu mai i le amataga o le tausaga fou.