O loo taula i le uafu tele i Apia se vaa o le fitafita o le sami o le Malo o Farani i le faamoemoe e faia nisi o ana galuega fesoasoani i lo tatou atunu’u, aemaise e faatino ai ma ni faata’ita’iga ma a’oa’oga ma le auvaa o le va’a leoleo o le Nafanua III.
E lē gata o luga o le sami o le a faia ai ia faata’ita’iga ma a’oa’oga ae o le a faatino foi i le lau’ele’ele. O se tasi o galuega tau’ave a lea va’a o le fitafita o le sami a le Malo o Farani o le lagolago i le leoina o ogasami o atunu’u o le Pasefika e aofia ai ma Samoa.
E autū lea lagolago i le mata’itūina o le fagotaina faasolitulafono o ogasami, aemaise o le mata’itūina o faiga solitulafono e pei o le uia o ogasami o le Pasefika mo le fe’avea’iina ai o fuala’au faasāina.
E ofoina foi e lea va’a o le fitafita o le sami o le Malo o Farani fesoasoani i le lauina o uta o oloa e manaomia e atunuu i taimi o ni faalavelave faalenatura.
O le Aso Lua na afea ai Samoa e lea va’a ma le faamoemoe e toe tu’ua Samoa i le Aso To’ona’i o lenei vaiaso.
Comments
Loading comments…