Ua faifai tetele faiga a le au taufaavalea lea ua oo ina agai i nai tagata o loo saili ni fale mautotogi ma ua o latou faaaogā ai foi le social media, fai mai ua ma’umau ai ma le $3,200 a se tasi o tamaitai.

O le tamaitai mai Aferika i Saute o Fiona Mathebula ua lipotia i le 9News sa sailia vave sona fale i Sini i ni nai masina talu ai.

O lana molimau i le televise ua ta’ua ai sa ia faafesootaia se fale mautotogi i Sini i se tulaga faavavevave ma sa ia liliu ane ai loa i le facebook e sue ai sona fale. 

Na maua le apartment o loo avanoa mo le 12 masina mo le $420 i le vaiaso e pei ona faasalalau ai ma ia fesootai loa i le tagata faapea a ia o le pule o le fale.

Mulimuli ane i fetuunaiga na faia mo le agai atu i le fale na iloa ai e le tamaitai e pei ona faatalanoa e le televise 9 ua faaseseina o ia, ae ua mae’a ona ia transfer le $3,200 o le bond na faaaogā ai se ofisa lafotupe faavaomalo.

E lei toe maua le fesootaiga ma le tagata i le facebook, lē toe maua ma le tupe na totogi, ae atili ai ona mafatia si tamaitai ona e leai foi ma se fale sa fuafua e maua.

Ua fautua mai leoleo i tagata ia mataala ma siaki muamua ma faamautu pe faamaonia faamatalaga a o lei faia ni peimeni pe totogi ni vaegatupe tetele.