E to’a 93 alo Samoa ua mae’a aoaoga ma ua faauuina mai le aoga a Matata Eseese a Ausetalia le APTC (Australia Pacific Training Coalition) i lenei vaiaso.
O aoaoga a i latou ua faamanuiaina na lagolago malosi e le malo o Ausetalia ma o le polokalame a le APTC e aofia ai matata eseese e pei o le kuka, Hospitality, Counselling ma le tele o mataupu.
O le au faauu e mai i Matagaluega a le malo, o pisinisi tuma’oti ma faalapotopotoga a le malo. Na auai le afioga i le Sui Palemia, Tuala Tevaga Iosefo Ponifasio e fai ma sui o le malo i lea faamoemoe ma na ia ave le faamalo i le au faauu ma faamalosiau iai ina ia faaaoga lelei le tomai ma le metotia ua maua mai le APTC mo a latou galuega i le lumanai.
O le aoga a le APTC o se tasi lea o faamaoniga o le mausalī ma le maua’a o faiga faapaaga a malo e lua. Na ave foi le faamalo a le Hai Komesina o le malo o Ausetalia Emily Luck i le au faauu mo le mataina o a latou taumafaiga.
