Ua faailoa nei sui tauva mo vaega faaupufai e lua o loo nofoia nofoa o le Palemene, le vaega e puipuia aiātatau a tagata, ma le Faatuatua i le Atua Samoa ua tasi mo le palota laititi a Vaimauga 3 e faia i le Aso Faraile mulimuli o lenei masina o Fepuari.
O le Aso Tofi na momoli atu ai le sui tauva o le Faatuatua i le Atua Samoa ua Tasi le afioga Lautimu’ia Uelese Vaai i le pati faaupufai ua ia lagolagoina ma lona itumalo o Vaimauga 3, e faapea foi i le sui tauva o le vaega e puipuia aiātatau a tagata le susuga Samau Leatigagaleono Solitamalii Samau Timani.
O le tofa Pupualii Kalepo sa fai ma sui o le afioaga o Matautu i Apia e momoli aloaia lo latou sui faatū i se feiloaiga ma le taitai, o le sui taitai ma nisi o sui faipule o le faafaletui o le pati e puipuia aiātatau a tagata.
O le tofa Mataipule Faaniniva Tupu mai le afioaga o Magiagi sa fai ma fofoga taumolimoli o le itumalo e faaulufale ai lo latou sui faatū i le vaega faaupufai a le Faatuatua i le Atua Samoa ua Tasi, a o faafofoga le taitaifono o le pati, ma sui o lea faafaletui ma nisi o faipule o le vaega faaupufai.
O le Aso Faraile le faaiuga o lenei vaiaso e tapunia ai le lesitala o suafa o matai ua avea ma sui tauva, ma le avanoa mulimuli e toe faaui ai i tua se suafa o se sui tauva, o le Aso Tofi a sau le aso 9 o Fepuari.
O loo iai le talitonuga e toatolu sui tauva o le a faia iai le filifiliga a Vaimauga 3, ae faatoa mautu ma faamaonia lea aofaiga pe a tapunia le lesitala o suafa o sui faatutū.
