Lealailepule Rimoni Aiafi
Lealailepule Rimoni Aiafi

Faaulu atu i le Matagaluega o leoleo le faitioga a le HRPP

O le vaega faaupufai e puipuia aia tatau o tagata le HRPP lea ua faaulu atu nei le latou faitioga faasolitulafono faasaga i taitai o le vaega faaupufai a le Faatuatua i le Atua Samoa ua Tasi ma o latou sui faipule ae le gata i lea o Loia a lea vaega faaupufai.

O lenei faitioga e faasaga tonu lea i le faatautoga a le FAST lea na fai i fafo o le faleie i le Aso 24 o Me lea na mulimuli ane faaleaogaina e le faamasinoga i le Aso 28 o Iuni 2021 ma faapea e soli faavae.

Faia i le Aso 5 o Iulai o le tusi faitio na faamaonia e le failautusi a le HRPP ia Lealailepule Rimoni Aiafi ma tuuina atu i le Komesina o Leoleo Fuiavailiili Egon Keil.

O i latou o loo faasaga iai lenei faitioga o le afioga i le sa’o faapito, taitai o le FAST Fiame Naomi Mataafa, taitaifono o le FAST Laaulialemalietoa Leuatea Polataivao Schmidt, o le latou sui filifilia lea na faatinoina galuega o se fofoga fetalai i le Aso 24 o Me Li’o Papalii Masipa’u faapea ai ma Loia o le vaega faaupufai Matafeo George Latu ma Taulapapa Brenda Heather Latu.

O se vaega lenei o le tusi na tusia i le gagana faaperetania ma na fai Lealailepule ma sui o le vaega faaupufai atoa:

“My purpose in writing is to give notice of a complaint airing out of the recent decision by the Supreme Court delivered on Monday 28 June, 2021″.

“The court clearly stated that the 24th May, 2021 swearing in under the tend outside Parliament by F.A.S.T. party members [and] their legal advisers is unconstitutional, unlawful and therefore deemed void and of no effect.”

“I respectfully, lodged a formal Police complaint against Matafeo George Latu and Taulapapa Brenda Heather-Latu given that they were instrumental and took the lead in advising the F.A.S.T. party leaders and members to conduct the unlawful swearing in ceremony”.

I lenei tusi faitio ua faaoo atu i le Matagaluega a leoleo e le sui filifilia a le HRPP ia Leala i le amataga o lenei vaiaso e faatatau lea i le mataupu o le faatautoga a le FAST na faia i lalo o le faleie ae peitai i se tasi o faatalatalanoaga a le Palemia o le Malo Tausi Tuilaepa Lupesoliai Sailele Malielegaoi ma tusitala i le Aso 28 o Iuni ina ua fesiligia i lea mataupu na ia taua ai “e le tau avea i le faamasinoga”. Ae ui i lea ua tauala atu le tusi faitio i le failautusi o le vaega faaupufai le afioga ia Lealailepule Rimoni Aiafi.

O le talitonuga a Leala i lalo o tulaga faa le faavae ma tulafono o le Palemene e leai se tasi e mafai ona faatinoina se faatautoga vagana ai le tagata e iai le malosiaga e fai ai e pei o le Ao o le Malo faapea le fesoasoani a le failatusi o le fono aoao faitulafono.

O le faitioga faasaga ia Li’o Papalii taua e Leala e ui o ia o se loia sinia ae na masalomia na ia faatino nei gaioiga e solia ai le faavae ma tulafono a le Palemene e pei ona tuumai ai e le faaiuga a le faamasinoga.

I lea tusi na taua e Leala o Fiame ma Laauli o loo masalomia o tagata faaosooso ia ina ia fai le faatautoga ma tauanau ai tagata ina ia auai.

Taua e Leala “O Laauli na faaauau pea ona ia faaosooso i tagata lautele  ina ia faasagatau i le malo ma e tatau ma talafeagai ona faia ni moliaga faasaga ia te ia ona o ni faamatalaga faifai na ia faia faasaga i tamaitai lea e lagolagoina le HRPP.”

Na oo le faitioga a Leala i Loia na galulue e lagolagoina le FAST i le taimi o le faatautoga.

“O Fauolo Harry Schuster, Precious Chang, Muriel Lui, Tuala Ponifasio ma sui lagolago na auai i lea faatautoga e solifaavae”.

Taua foi i le tusi faitioga solitualfono a Leala ua faia lava e taitai o le FAST le faaiuga e filifilia ai le latou Palemia filifilia, o le Sui Palemia filifilia ma minisita filifilia o le kapeneta.

Ae le gata i lea na taua e Leala na faia e Fiame ni pepa o faamatalaga tuuina atu i malo e pei o Niu Sila, Ausetalia ma isi atu motu o le Pasefika mo se fesoasoani faavaomalo. Taua e Leala “o nei gaioiga ua faaititia ai ma faaleaogaina ai le tauleleia o le Malo o Samoa ua leva ona iai e ala i fa’apa’aga faavaomalo ma ia atunuu”.

Faamanino foi e Leala i le tusi faitio “Na faaauau lava le galulue o taitai o le FAST e pei ua aloaia le filifilia o i latou e avea ma malo o Samoa ma na faia ma le mautinoa le fa’aaoga o le malosiaga o ofisa faasalalau (media) e faia ai ni gaioiga e lafotūina ai le malo o Samoa”.

Taua foi e Leala “O loo faaauau pea le lē mananao o taitai o le FAST e faia se feutagaina e soalaupule ai mataupu  i le va o vaega faaupufai e lua”.

Talu ai tuuaiga e masalomia ai le faia e Laauli o ni faamatalaga faifai faasaga i tamaitai taua e Leala e toatele tina ma tamaitai ua tuu atu a latou faaseā e ala i lea mataupu.

Na faailoa foi e Leala o loo iai molimau e lagolago ai nei faitioga faia faasaga i sui o le FAST ma o le a tuuina atu i le Matagaluega o leoleo. Ma e lei taofi ai ī le faitioga a Leala, na ia tusia foi ua talosagaina i leoleo e faia ni molaiga faasaga ia Fiame, Laauli, Olo Fiti Vaai, Faumuina Wayne Fong ma isi sui sinia o le vaega faaupufai.

Na faamaonia e le Komesina o Leoleo Fuiavailiili le taunuu atu ai o le tusi faitio ua faia faasaga i ni sui o le FAST ma na ia taua ua tuuina atu nei le mataupu i le vaega o Suesuega o soligatulafono (Criminal Investigation Unit). O le taimi nei e le’o manino mai pe e iai, a’o a foi moliaga o le a faia i sui ua faasaga iai le faitioga.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required