O le aso 17 o Mati o le tausaga fou 2023 o le a lau ai se faaiuga a le faamasinoga sili, faasaga i se tina ua ioe i moliaga e 4 e aofia ai le faaoo o se manua e faaaoga ai se laau malosi, umia ma le faapapa o se laau malosi, ma le umia o se fana e lei lesitalaina faaletulafono.

O le moliaga e tasi o le taumafai e faaoo le maliu i se isi tagata, ua talia e le faamasinoga le talosaga a leoleo e faaui i tua.

O Leuluaialii Selesitina o Solaua na molia e leoleo i ia moliaga i le tausaga e 2019 ona o se gaioiga a ni taulelea na faaoolima ai i lona toalua.

Faaalia i faamaumauga a leoleo o le mafuaaga lea na ia umia ai se laau malosi o le ituaiga o le 22 rifle poo se pulutasi ma ia faapapa e tutuli ese ai taulelea na faia le faaoolima.

O se ututau mai lea gaioiga na ia faia na aafia ai se vaega o le malu o le tuafale poo le nofoaga o se tasi o taulealea. O le lipoti a le fomai na faia togafitiga ua faailoa ai o se manua e leai se aafiaga e faamatau ai le soifua o le na aafia.

O le lipoti lea o le a iloiloina e le faamasinoga e fuafua iai sana faaiuga i se faasalaga. O le Aso Lua o le vaiaso nei sa faatulaga e valaau ai molimau a leoleo, peitai e lei taunuu ina ua faailoa e le loia a leoleo le toe faaui i tua o le moliaga autu ma ua faaleaogaina e le faamasinoga, peitai na suia ai foi ma le tetee a lē ua molia i lona ioe i isi ona moliaga e 4.

O loo tatala pea i tua Leuluaialii Selesitina i aiaiga ua mae’a ona faataoto e le faamasinoga, e faatali ai le tausaga fou o le a aumai ai sona faasalaga.

Talu ai ona e iai se sootaga o le afioga i le Faamasino afioga Fepuleai Ameperosa Roma i lē ua molia, ua filifilia ai se isi faamasino le susuga Leiataualesa Darrel Clarke na te iloiloina vaega uma o lenei mataupu mo se faaiuga.