I se tusitusiga a se alii Loia faaletulafono mai Ausetalia Dr Anthony Regan lea o loo aumau nei i Papua Niu Kini na ia taua ai, o le tulaga lea ua iai finauga mo se faigamalo mautu mo Samoa e leai se eseesega ma le faafitauli na oo ai Papua i le tausaga 2011- 2012.O lea faafituali i Papua na matua aafia ai le faamasinoga maualuga ma e lei oo ai i se tulaga lelei.
Taua e Dr Reagan “ O Samoa e le’o le atunuu muamua lea i le Pasefika ua tulai mai ai se feeseeseaiga faapea i le finau ai o taitai o Vaega faaupufai e lua poo ai e taitaia le atunuu”
Mo Papua, i le 10 tausaga ua tuanai na iai foi se le mautonu ma le feeseeseai ai o le taitai o lea atunuu ina ua maua lē sa avea ma Palemia ia Michael Somare i gasegase o le fatu lea na malaga ai i Singapore mo togafitiga, na tulai mai ai se iuga i le Palemene a lea malo ina ia faamalolo Somare seia toe faafoisia lona malosi ma filiflia ai loa Peter Oneil ma Palemia o lea Malo.
Ina ua toe foi mai Somare mai togafitiga na ia agai sa’o i le faamasinoga maualuga e finau ai i le lē faatulafonoina o le aveesea ai o ia mai le tofi ma totonu o le Palemene, mulimuli ane faamaonia e le faamasinoga maualuga le finauga a Somare e lē faavaea le aveese ai o ia peitai i lenei faaiuga e le’i taliaina e Peter Oneil. E 11 masina na faasolo ai finauga o lea mataupu i totonu o Papua.
Mo Samoa ua silafia e le toatele le tulaga ua iai nei faiga upufai o Malo, faamaonia mai e le Faamasinoga iuga talu ona maea le faigapalota i le Aso 9 o Aperila lea e 26 sui filifilia a le FAST ina ua tusiaao iai le sui tutoatasi Tuala Ponifasio Tevaga e galue i lalo o le faamalu a le FAST ae tulai mai le HRPP i sui e to’a 25.
Peitai o loo finau lava le taitai o le HRPP Tuilaepa Lupesoliai Sailele Malielegaoi e lē mafai ona tauaofia se Palemene pe a le atoa le 10 pasene o nofoa o tamaitai i le maota fono.
Taua e Dr Regan “o le tele o nei faaiuga ma mau ua aafia ai galuega a le faamasinoga ma lona tutoatasi.”
