E CAD40,00.00 poo le tusa lea ma le $81,000.00 Samoa, le tino i tupe na foaiina e le amepasa o le malo o Kanata, mo le aoga tulagalua a le afioaga o Saipipi.

Na tusi talosaga e fai ma sui o le komiti a le aoga, nisi o tamafanau a le nuu i le fesoasoani tau tupe, e tauala lea i le Canada Fund for Local Initiative (CFLI) i le tausaga na tea nei, 2022.

Na talia le talosaga, ma tuuina mai loa le vaega muamua o lenei fesoasoani i le faaiuga o le masina o Novema 2022.

Na amatalia galuega mo le faaleleia ma le faamatagofiena o le potu i le masina o Tesema.

O lenei fesoasoani tau tupe na faaaoga tatau lava, e tusa ai ma taiala o le maliliega na sainia e le komiti ma le amepasa o Kanata.

O le agalelei mai o lenei paaga, e mo le faaleleia o le faitau a fanau o le Aoga aemaise foi mo nai faiaoga aua a latou tapenaga.

O lenei foai na mafai ai ona maua mea nei: Fata Tusi, Tusi Faitau, Tusi mo Faiaoga, Kesi ma Nofoa mo Faiaoga, Laulau ma Nofoa Faamoe, PC Set ma le Laptop, Photocopier, Projector, Ea Mālūlū.

Na asiasi mai le sui o le CFLI i le Aso Faraile 02/03/2023, ma ia molimauina ai le galuega tele sa fesoasoani mai ai.

Na ia faafetaia le susuga i le tamaitai pule, faiaoga faapea le komiti ona o le faaaoga tatau o lenei meaalofa tupe.

Sa saunoa le tamaitai pule ia Vaoita Iosefa, e faafetaia le amepasa o le malo o Kanata, mo le fesoasoani tele ua ma’au iai.

O le loto faafetai ma le agaga vivii a’e, ina ua saunoa Mr Lorenz e fai ma sui o le amepasa, e tatala ai loa le faaaogaina o lenei poloketi.

Faamanuia le Atua i le amepasa o Kanata mo le agalelei faasoa, ua faamanuiaina ai le aoga tulagalua a Saipipi.