E 2 afe faifaatoaga niu i le atunuu o le a agai iai se polokalame e faatino e le faalapotopotoga o tina faipisinisi i le faamoemoe e tape ma fasi mate le manu ‘ainiu o se manu faalafuā ua matuā lamatia ai le ola lelei o le laau o le niu, o loo maua ai le popo e gaosi ai le suauu o le virgin oil, o loo alumia i maketi i fafo.

Ua mafai ona faatino lea galuega fesoasoani a le faalapotopotoga o le WIBDI poo le Women in Business Development ona o se foai tupe mai le polokalame fesoasoani a le Malo o Amerika e 997 afe 564 tala meleke.

O le faafitauli tuga lea ua leva tausaga o feagai pea ma le atina’e o faatoaga niu o le manu ‘ainiu, ae o lea seleni tele o loo iai le talitonuga o le a faasafua e faagaioi ai polokalame e tapē ai lea manu faalafuā, ma toe ola lelei ai niu e maua ai le popo e gaosia ai le suauu.

A lelei foi le ola o lea laau tau faatoaga o le a faapena foi ona lelei popo e maua ai le peepee o le isi oloa o loo alumia foi i maketi i fafo ma Samoa.