I le 44 ai lenei o tausaga talu ona mausali pea sootaga faavaomalo o Samoa ma le Malo o Aikupito o se atunuu Arapi i Sasae Tutotonu, ua saga faamautu pea ia sootaga vavalalata i le tauaao ai o tusi taualoa o le tamaitai Amepasa filifilia o lea Malo mo Samoa ae faamautu i Ueligitone i Niu Sila.
O le aoauli o le Aso Lulu na tauaao atu ai tusi taualoa o le filifilia o le tamaitai Amepasa o Dina Farouk i le afioga i le Ao Mamalu o le Malo, le afioga Tuimalealiifano Vaaleto’a Sualauvi II i se sauniga i le maota o le Ao Mamalu o le Malo i Vailele.
Na faailoa ai foi e le Amepasa le galulue faatasi pea o lona Malo ma le Malo o Samoa i fesootaiga i totonu o Malo Aufaatasi o loo saofafai ai Malo e lua o ni sui o lea faalapotopotoga tele o atunuu o le lalolagi.
O le uluai sui lea o le Malo o Aikupito ua avanoa ona malaga mai i lo tatou atunuu ma tauaao tusi taualoa o lona tofiga i le Ao Mamalu o le Malo o Samoa, talu ona le mafai ona femalagaa’i le lalolagi i le lua tausaga ma masina ona o puipuiga o le faamai Koviti-19.
Mo le silafia ua faamautu foi sootaga o le Malo o Samoa ma se tasi o atunuu i Sasae Tutotonu, o le Malo lea o Isaraelu lea na atoa i le masina o Me o le tausaga nei le 50 tausaga o ia sootaga faavaomalo.
