Faalogo Ivins Chan K Tong
Faalogo Ivins Chan K Tong

Faatulai ese Faalogo Ivins ma le afioaga o Malie

Ua ripotia mai le faatulai ese ai ma le afioaga o Malie le sui tauva a le Faatuatua i le Atua Samoa ua Tasi mo Sagaga No.2 i le vaiaso nei le susuga Faalogo Ivins Chan K Tong ona ua ia lē usitaia le finagalo o le nuu i le lē talia lea o ni faalauiloa a pātī faaupufai i lea afioaga.

I se faatalatalanoaga a le Samoa Global ma le matai o le afioga o Malie poo le sooupu foi lea o le nuu ia Auimatagi Saoloto ma faamaonia ai le faaiuga i le tapu ona toe fai o ni faalauiloa a se vaega faaupufai na autasi uma iai le afioaga i se fonotaga i le masina na te’a nei.

Taua e Auimatagi na tau fai tuu atu faamanuiaga a le afioaga i sui tauva e toalua o le nuu o loo faamoemoe e tauva i le palota laititi i le vaiaso fou o le sui a le FAST Faalogo Ivins Chan K Tong ma le sui a le HRPP ia Faamausili Siona. Na ia faailoa fou na asia e pāti uma e lua le latou itumalo (Sagaga No.2) i nai vaiaso ua tuanai atu e Ala i se fonotaga na faia i le nuu o Afega ma na a’e ai loa se manatu i le afioaga o Malie e lē toe manaomia ni faalauiloa i lo latou lava nuu.

“Ua le toe moomia la nisi faalauiloa e toe solia le nuu, Pau le mea o le fia maua o le filemu ao alo atu i le faigapalota”.

Peitai taua e Auimatagi na faateia i latou i le vaiaso nei i tapenaga a le FAST mo le latou faalauiloa i totonu o le afioaga na faanatinati loa le taloina o le fono a alii ma faipule e saili le mafuaaga o nei tapenaga, mulimuli ane iloa e le nuu ua agai lava Faalogo Ivins e faataunuu fuafuaga e ala i se faalauiloa a le FAST i totonu o Malie. 

O le manatu o alii ma faipule o lea afioaga ua lē usitaia le finagalo o le nuu, ma autasi ai loa e faatulai ese Faalogo Ivins mai le afioaga. Na ia taua foi na avatu foi se talosaga a le HRPP e asia le afioaga i se faalauiloa tauala atu i le sui faipule tuai mo Sagaga No.2 ia Seiuli Ueligitone Seiuli peitai na ave ai foi le tali e tasi e lē toe faatagaina ni faalauiloa peitai e foliga mai o loo iai se sasi i le fesootaiga a Faalogo ma lana vaega faaupufai.

Faailoa foi e le nuu o le faaiuga i le faate’a ai o Faalogo Ivins e le’o se faaiuga faapolokiki ae o le faaiuga tonu ona o le loto faitalia o lea sui na manatu ai e fai pea le faalauiloa a le FAST e ui ua maea ona autasi le nuu e faasā ma tapu nei faalauiloa i totonu o le afioaga.

Na taumafai atu le tusitala mo se tali mai a le sui tauva peitai e le’i maua sona finagalo i lea taimi.

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required