Ua faatulaga nei o le Aso Gafua 20 o le masina nei o Novema o le a amata ai galuega a le faamasinoga o talosaga toe iloilo poo le faamasinoga apili a le faamasinoga maualuga a le atunuu, lea o le a toe iloilo ma tagofia ai nisi o mataupu tau faamasinoga ua mae’a ona faia iai ni faaiuga.

O le tasi o faaiuga a le faamasinoga sili o le a toe iloilo ai, o le faaiuga ua faamuta ai le faasalaga 2 tausaga o le faamalolo lē tumau o sui faipule o itumalo faapalota o Lepa ma Faleata 3.

E pei ona silafia o le tauaofiaga a le fono aoao i le masina na tea nei o Oketopa na toe ulufale ai i le Palemene ia sui faipule, e ui sa na o le faipule o Faleata 3 ona sa malaga i fafo le faipule o Lepa.

O le afioga i le Fofoga Fetalai ua auala atu ai le talosaga i le faamasinoga apili ina ia toe silasila i ni vaega o le faaiuga ona ua lē tausisia ai le tulaga tutoatasi o le Palemene ma ana faaiuga fai.

O le tasi o faaiuga a le faamasinoga sili o le a toe iloilo o le faaiuga lea faasaga ia Lema’i Faioso Sione ua faasala i le falepuipui faatasi ai ma Malele Atofu Paulo ina ua faamaonia o la moliaga o le taupulepule e faaoo le maliu i lē sa avea ma Palemia.

O loo apili e Lema’i Faioso Sione le faasalaga, o le faamaonia o le moliaga, ma le talosaga pe talia le faaulu atu o ni mau fou poo fresh evidence.

E tolu faaiuga tau i mataupu lautele poo civil ma faaiuga e fā i mataupu tau solitulafono poo le criminal o le a tagofia e le faamasinoga o talosaga apili a le faamasinoga maualuga a Samoa.

O le tauaofiaga mulimuli foi lea a lea faamasinoga mo lenei tausaga ua toe o se masina ma vaiaso ona mae’a lea.