O Setema o le tausaga nei ua atofa e iloilo ai e le faamasinoga maualuga le tagi a se alii sa pagota muamua e faasaga i le Matagaluega o Leoleo ma Falepuipui.
O Sio Agafili na faamaonia e le faamasinoga i nai tausaga ua mavae le faafalepuipui faasolitulafono mo le umi e 4 tausaga ma le 7 masina, ina ua sili atu le taimi na loka ai nai lo le umi o le faasalaga na tuuina atu iai e le faamasinoga ona o ni moliaga o le gaoi.
Na toe valaauina Sio e tulai i le Faamasinoga ona ua molia mai i lona faaoo o manuaga tuga i se tasi pagota.
O lea faalavelave na tulai mai i le 2020 ina ua taumafai pagota e sosola i tua ma le falepuipui ae na fesoasoani Sio i leoleo falepuipui ma ia faaoolima ai i le isi pagota a o taumafai e sola i tua.
O lea mataupu sa faaleaogaina e le faamasinoga maualuga ina ua le mafaia e le itu a leoleo ona faamaonia i ni mau le moliaga o le faaoo o manuaga tuga.
O le tagi a Sio e faasaga atu i le Matagluega o Leoleo ma Falepuipui e lata i le $1miliona tala lona taui.
