O loo faasalalau solo faalauaitele se faasilasilaga mai le Matagaluega o Soifua Mālōlōina i Samoa, i luga o fesoota’iga televavave le facebook, e lapataia ai le mamalu o le atunuu ina ia ‘aloese mai le faatauina o se ituaiga o fuamoa.
E lē o ituaiga uma o fuamoa e faasino i ai lenei lapataiga ma le taofiga, ae o se ituaiga o fuamoa o loo la’uina atu i totonu o le atunuu o Fiti.
O loo ta’ua i lea faasilasilaga, ua faia lenei lapataiga faalauaitele, ina ia tusa ai ma le Vaega 21 o le Tulafono Autū o Taumafa 2015. O le faasilasilaga ua faasā ai ona faatauina atu nei oloa o fuamoa i tagata faatau, ma faatonuina foi le aveese loa mai fata o faleoloa o loo faatauina ai.
Ta’ua atili i lenei faasilasilaga, o nei oloa o fuamoa, ua faamauina le lē saogalemu mo le fofoga taumafa ona ua maua i sailiiliga, e lē o sa’o faamatalaga o aso na tuufua ai moa (laying dates) e maua mai ai nei fuamoa.
O lenei gaioiga lē faamaoni ua lē mulimulita’ia ai le Tulafono o Taumafa 2015.
O le ta’iala mo fuamoa (Eggs Standards) i le Vaega 6 (Schedule 6) o le Tulafono o Taumafa 2015, o loo ta’ua ai, e lē talafeagai mo le fofoga taumafa fuamoa, ua sili atu ma le tolusefulu (30) aso faatulagaina. E lē tatau ona toe faatauina atu pe taumafaina.
O le faatonuga tuusa’o la ua tuu atu i le aufaioloa poo le aufaipisinisi o loo kilivaina pe tufatufa atu lenei oloa, pe o supamaketi, faleoloa mo oloa siiatoa, poo fale’aiga, ia taofi nei loa le toe faatauina atu ma le faaaogāina o fuamoa mo lenei lava ituaiga faapitoa, mo le fofoga taumafa.
Ituaiga o fuamoa ua faasā i le taimi nei:
Atunuu auina mai ai le oloa: Fiti
Oloa: Fuamoa (Crest Table Eggs)
Fale Gaosi Oloa: CJS Supermarket, Fiji
