Ua toe sola mai ma le alii o Falaniko Penesa o Samoa le siamupini o le tauvaga siva ailao afi a le lalolagi sa faia i le setete o Hawaii i le masina nei, ma o se tala fiafia lea i le tapuaiga a le kalapu ailao afi a Samoa sa auai i lea tauvaga faavaomalo.
O le tausaga e 2018 na uluai siamupini ai o ia i lea tauvaga, sosoo ai ma le tausaga e 2021, ae ua toe siamupini foi i le tauvaga o le 2023.
I le vaega o alii na tauva ai Falaniko na tulaga lua ma tulaga tolu sui tauva mai Hawaii. E tolu isi vaega o le tauvaga o tamaitai, ma le vaega feoololo le intermediate i le matutua o le 12 i le 17 tausaga, ma le vaega laiti poo juniors mai le matutua o le 6 i le 11 tausaga.
O le susuga Falaniko Penesa e mai le afioaga o Puipaa i le itumalo o Faleata.
