Ua faaalia se faatoesega a le Matāgaluega o le Soifua Mālōlōina Te Whatu Ora i se aiga Maori, i lo latou faatamala, ua afua ai le telē o aafiaga i le soifua mālōlōina o le tamaitiiti o lea aiga.
I lipoti mai le leitio faavaomalo a Niu Sila, o lē o loo aafia o Noah, 11 tausaga le matua ma o se tamaitiiti e iai aafiaga tumau o lona soifua.
Na faamatala e mātua o Noah o le matāupu ma le ofisa o le soifua mālōlōina, na amata mai le tausaga 2023, ina ua amata ona fetaia’i Noah ma ma’i o le tino mai le faama’i o le fulū.
Ma ina ua avatu le atalii i le itu e vaai ai tamaiti poo le children’s ward, na iai le manatu o mātua o Noah o le a faanatinati ona avatu mo le pediatric emergency talu ai foliga vaaia ma le tigāina o si o la atalii peita’i e le’i ave iai le faamuamua a foma’i.
Na māua i lipoti, o le po atoa o nonofo le aiga ma mata’itū foliga vaaia o Noah, ma na ta’ua na oo ai lava ina faateteleina le ma’i o le tamaitiiti.
Na faanatinati ona avatu Noah i le falema’i o le Starship, ma taoto ai mo le isi 9 aso, ae i nei aso na faaalia na koma ai Noah, ma feagai ma isi ma’i e le’i vaaia muamua, ma aafia ai lava lona aao (vae) se’i tulou.
I le ala mai ai o lē ua aafia ua lē mafai ona savali.
Ma i le alia’e ai o lenei mataupu, ua tuua’ia e le aiga o Noah le falema’i ona o le faatamala, ma le lē lelei ona faatino o le pitolaau a foma’i i le vaaia o le atalii, ma e manatu mātua o Noah e lē oo le atalii i lea tulaga pe ana lelei le faatino ai o a latou galuega e tusa lava poo iai ni aafiaga tumau o le soifua o le tamaitiiti.
Ua lata nei le 2 tausaga talu ona tula’i mai lenei mataupu, ma na ta’ua e mātua o Noah, o le a fetaia’i pea lo latou aiga ma aafiaga o si o la atalii talu ona tula’i mai lenei faafitauli, ae ua o la manatu, ia avea ia lenei mataupu o se lamepa susulu, e faailoa ai i le to’atele o mātua ma aiga e iai fanau e feagai ma aafiaga tumau o le soifua, ina ia finau malosi mo a latou fanau pe a tula’i mai nei faafitauli i soo se matāgaluega lava e pei o le soifua mālōlōina.
Puna o Faamatalaga: https://www.rnz.co.nz/news/national/558921/autistic-child-s-family-struggle-for-support-after-medical-injury-leaves-him-unable-to-walk
