Ua faia se faatoesega a le alaleo faasalalau i Apia le Radio Polynesia ona o le sese o se latou lipoti na faailoa ai le taofia e le pulega o le matagaluega o faatoaga i Amerika Samoa, o se uta fuamoa mai fale fuamoa o le Sunshine Farm o loo faagaioia e se faipisinisi i Samoa le kamupani a Frankies.
Ua faailoa e se tusitala sinia o le leitio le afioga Leilua Ame Sene Tanielu, o le lipoti na latou faasalalau sa maua mai i lo latou sui tusitala e faamautu i Tutuila, peitai na latou maua le tusi mai le Konesula o Samoa e faamautu i le Teritori le susuga Fata Brian Kaio, o loo faailoa ai se fesootaiga na ia faia ma le pulega o le matagaluega o Faatoaga i Amerika Samoa, ma faailoa atu e sese ma lē sa’o lea lipoti.
I le taulimaina ai o lea tusi a le Konesula, o loo faaalia ai e Fata ua faailoa atu e le sui Faatonu sili o le matagaluega o faatoaga a Amerika Samoa, e leai ma se uta fuamoa mai Apia na faaleaogaina ma faatama’ia ona o ni tulaga faaletonu.
O le uta fuamoa na avatu e le Lady Samoa IV i le vaiaso na tea nei, na tiliva uma i pisinisi ma e leai ma se faaseā na tuuina atu.
E pei ona silafia e le atunuu o le mae’a o talanoaga o le Atoa Samoa i le masina o Oketopa o le tausaga na tea nei, na faamautu ai le tatala mai o faitotoa o Tutuila ma Manu’a e avatu ai nisi o oloa tau faatoaga e pei o fuamoa ma aano o manufasi e pei o fasipovi.
