O se tasi lenei o vaega o le polokalame faamanatu o le faatāuaina o le siosiomaga a le Matagaluega o le Siosiomaga lea e aofia ai le malamalama tuufaasolo i alo ma fanau e silafia ai le tāua o le puipuia saogalemu o le siosiomaga.
I se pepa o faamatalaga mai le Ofisa Sooupu a le Malo, e 52 alo ma fanau aoga ua faaopoopoina nei i le fuainumera o tamaiti aoga ua tauaaoina tusipasi i le mae’a ai o aoaoga talu ona faavaeina le polokalame lenei i le 2018.
O fanau aoga sa auai e mai le 5 Aoga Tulagalua na galulue faatasi e aoaoina vaega eseese o lenei polokalame e aofia le fagota fuafuaina lea o le gataifale, puleaina o otaota ma lapisi, malamalama i vaega o amu ma aau aemaise togatogo faatasi ai ma le tomai i le olaga folau o se tasi o vaega o le aganuu.
Faaalia e le Faatonu o le faalapotopotoga a le Conservation International Le’ausālilō Leilani Duffy-Iosefa o le vaega mulimuli lenei o lea polokalame mo lenei tausaga.
“A o lalata mai foi suega a le fanau o le agaga fiafia ma le faafetai o le vaega mulimuli lenei o loo mafai ona auai mai se fuainumera tele o alo ma fanau.
“E lē uma ai le lagolago a matou paaga e toe faatino pea lenei polokalame i le tausaga fou pe a aulia auā lava le fesoasoani lea i le aoaoina o fanau aoga i vaega tāua ma faatinoga e ao ina silafia mo le saogalemu o le siosiomaga.”
O le polokalame lenei o se galuega fai faatasi a le Conservational International ma le Malo o Samoa e tauala atu i faalapotpotoga tuma’oti ma sosaiete faatasi ai ma sui mai Matagaluega o loo fitoitonu ai mataupu tau le siosiomaga.
