O le amataga o le tausaga fou 2024 lea ua ta’ua e le Matagaluega o mataupu faalotoifale poo le Internal Affairs, e faatoa tatala ai le avanoa e talosaga atu ai tagata mo le faaputugatupe o le afā o Gabrielle poo le Cyclone Gabrielle Appeal Fund lea e 1.7 miliona na maua mai foai a tagata lautele ma le 11.7 miliona mai le se’i faapitoa o le Lotto ia Mati.
Ua lipotia i le asō e le RNZ se faamatalaga mai le Matagaluega ua faamaonia ai lea tulaga e faatoa tatala le avanoa e talosaga ai i lea faaputugatupe i le tausaga fou.
Peitai o le finau a kulupu mai le komiuniti ua faailoa ai o loo matuai manaomia lava i le taimi nei e i latou na aafia i le afā lea vaegatupe e fesoasoani ai mo latou ma e lē iloa pe aisea o le a toe tau faatali ai i le tausaga fou.
E ioeina foi lea tulaga e le pulenuu o Hastings o Sandra Hazlehurst lea na ia faaalia e toeitiiti aso uma e fesiligia ai o ia e le latou komiuniti mo se fesoasoani i aafiaga o le afā se’i maua ai se fesoasaoni peitai e lē iloa pe aisea e tau faatali ai i le tausaga fou ae o loo faalogoina e tagata mafatiaga i le taimi nei.
O loo ta’ua i le lipoti e toe ono faatalanoaina le mataupu lea i le Fonotoga a le Trust lea e vaaia ia tupe e faia i le masina fou o Oketopa.
