Lipotia mai nei le tuuina atu o le tau’au fesoasoani a le auaunaga ua ta’ua o le The Citizens Advice Bureau (CAB) mo le faitau afe o tagata Kiwi o loo feagai ma faatiauli o le taugata tele o le soifuaga, o tulaga tau femalaga’iga, o fale e aumau ai ma le faigata o le sailiga o galuega ma isi.
Ta’ua i ripoti, na faamauina ai le toatele o sui o loo galulue i le CAB o i latou e ofo fua o latou taimi poo volunteers i le lālā i Porirua na faamauina ai lo latou tali atu i soo se tasi e ulufale atu i faitoto’a o lo latou ofisa; o ē o loo moomia fesoasoani; o ē faato’a sitiseni o le atunuu ma o loo moomia le fesoasoani i o latou talosga mo tusifolau Niu Sila, e oo lava i tagata sulufa’i o loo moomia fesoasoani i talosaga mo galuega, o fale e aumau aemaise nai aiga e lē o i se tulaga lelei i itu tau tamaoaiga.
Fa’aalia e le faatonu o lea lālā ia Natalie Vermaak, toatele o nai tagata ua agai atu ua tauau ina mou le faamoemoe i le faigata ma le tele o vaega o loo moomia ai le fesoasoani.
O le Citizens Advice Bureau, o se faalapotopotoga tuma’oti, o loo faasoa atu lana auaunaga i le mamalu lautele. Māua o se auaunaga e faatupeina tauala mai i fesoasoani tau tupe ma meaalofa seleni e taulimaina. E oo atu i le 2,500 tagata galulue o ē e ofo fua o latou taimi poo volunteers ma 80 ona lālā i totonu o Aotearoa atoa.
Puna o Faamatalaga: https://www.rnz.co.nz/news/national/583353/changing-lives-every-day-inside-the-citizens-advice-bureau
