Ua mautu nei fausaga o tapenaga mo le suesueina o le tagi tau palota mai le Itumalo o Vaimauga 3, ina ua mae’a tagofia e le faamasinoga o faigapalota nisi o mataupu sa fia maua iai se finagalo o lea faamasinoga, a o lei valaauina molimau ma tuuina atu finauga a loia a itu auai o lenei faamasinoga.
O le Aso Tofi na tagofia ai le talosaga a le loia mo le faipule le afioga Lautimuia Uelese Vaai, o loo faasaga iai tuuaiga a le itu tagi poo le itu talosaga, i le teena lea o le faia mai fafo i auala o fesootaiga faaonapo nei o le molimau a le faipule o Faleata 3 le tofa Lealailepule Rimoni Aiafi.
Na faailoa e le loia mo le afioga Lautimu’ia, e mafua ona latou teena le fai mai fafo o le molimau ona o tulaga i fesootaiga faatekonolosi, ina ne’i iai se faaletonu e tulai mai, peitai na faailoa e le faamasino sinia le afioga Vui Clarence Nelson, o loo lelei tapena uma ia tulaga.
Ua talia ai nei e le itu sa tetee le talosaga a le loia a le itu tagi e faatino mai Niu Sila lea molimau i luga o auala o fesootaiga faatekonolosi o le video link.
O le tasi o talosaga a le itu o loo faasaga iai le tagi tau palota e talia nisi o a latou molimau faaopoopo se lua na faaulu ae ua mae’a le taimi faatulagaina, ua lē talia i le finagalo o le faamasino sinia e leai se ‘anoa o ia molimau i le finauga a le itu o loo tuua’ia.
E 12 molimau a le itu o loo faasaga iai moliaga o le a tutulai e molimau tetee i tuua’iga a le itu tagi, ae toatolu a latou molimau e lagolago ai a latou moliaga faasaga i le itu talosaga.
Mo le itu tagi e 2 a latou molimau e lagolago ai a latou moliaga faasaga i le faipule o Vaimauga 3, ae toaono a latou molimau o le a tali i moliaga a le sui faipule o le itumalo.
