O le afioaga o Lalomanu lea ua amata mea i le poloketi i le tulaga o le faamamāina o nofoaga tumatafaga ma suesueina ai ituaiga lapisi o loo faatupulaia i nei nofoaga.

O lenei poloketi o loo taimua ai le Matagaluega o le Siosiomaga faapea ai ma le Ofisa o Polokalame o le Siosiomaga a le Pasefika (SPREP) faapea ai ma le vaega mai Niu Sila e gafa ma lenei gaioiga.

E $3miliona Euro o loo faatupeina ai lenei poloketi ma ua mae’a ona fatino i nisi o atunuu o le Pasefika e pei o Fiti, o le Atu Solomona ma Vanuatu ae o le aso ananafi lea na amatalia ai i le komiti o tina o le afioaga o Lalomanu.

I faamaumauga ina ua mae’a lenei faatinoga na vaaia ai le tulaga ese ai o suesuega i le tele ai o le lapisi alamini poo apainu lea e tusa ma le 2.3kilo kalama le mamafa ma nisi o ituaiga apa e tusa lea ma le 1.15kilo na maua i nofoaga tumatafaga o le afioaga.

I faamaumauga a le Ofisa o atunuu ua mae’a faatino ai lenei poloketi o le tele lava o lapisi o uga (plastic) ae peitai o loo eseese ma le faatinoga sa faia.
O lenei la poloketi ua fuafua e faia lea i le autalavou a le afioaga o Vailuutai faapea ai le autalavou a le Ekalesia Asofitu i Pu’apu’a i Savaii.