O lenei fonotaga o loo taimua ai le Pulega o Faailoga ma Tusipasi Taualoa a Samoa i lalo o le autu ia unaia le tulaga o aoaoga faaauau i totonu o le atunuu e amanaia ai le tulaga o le ola aoaoina o alo ma fanau mo le lumanai i aso oi luma.
Faaalia e le Minisita o Aoga, Seuula Ioane Tuaau o le aogā o le fonotaga faapenei e aoao mai ai manatu ma mafaufauga mai soo se vaega e aga fesootai ma le taumafaiga ina ia tulaga lelei le itu tau aoaoga.
“O le auai o sui eseese mai le vaega o faiaoga o fanau aoga o i latou o loo nafa ma filiffiliga fai aemaise i latou o loo iai le tomai faapitoa e mafai ai ona tatou faafoeina ai auala eseese o metotia e mafai ai ona tatou unaia le pitolaau a faiaoga o loo nafa ma le aoaoina o fanau aoga ina ia tele se fesoasoani i le lumanai o Samoa.
“A o fotuai mai ai le isi lua aso o lenei fonotaga ia mafai ona tatala la tatou tofa ma le faautaga mo le suesueina o itu e faamalosia ai lenei faanaunautaiga ma iloiloina pe faapefea e vaaiga faaleaoaoga faaonaponei ona tatalaina le gafatia ina ia tutusa lava tagata aoao ma faiaoga.
“A o tatou suesue i talanoaga e uiga i polokalama faaleleia, faaaogāina o le tekonolosi, ma auala e faatinoina ai aoaoga ia o tatou manatua o a tatou filifiliga ma talanoaga o le a faia nei e mafai ona iai ona aafiaga lautele i tupulaga o aso o i luma.”
O le toe faamanatu a le Minisita ina ia mafai ona tatala atu auala ma manatu e faufau ai le faamoemoe autu o lenei fonotaga.
“Ia avea le tomai ma le iloa e fausia ai sootaga ma ia faasoa atu vaega uma e fesoasoani ai lenei faamoemoe ia aua ne’i gata ai i le fale nei ae ia faasoa atu auā le manuia lautele o aoaoga i le atunuu.”
O loo mafai ona faatino auaunaga a le vaega o aoaoga faaauau e ala i le fesoasoani ma le lagolago mai a le Malo o Niu Sila faapea ai ma le Malo o Ausetalia e tauala mai lea i le paketi o seleni e lagolagoina ai le itu i aoaoga auā polokalame ma galuega faatino a le vaega o aoaoga faaauau ina ia mautinoa le lelei o tulaga o aoaoga i Samoa.
O lenei fonotaga o loo faatautaia lea i le faletalimalo a le Taumeasina Island Resort.
