O paia i aiga ma le mamalu o le itumalo o Palauli le Falefa i le motu tele i Salafai na masii mai i Tumua i le Aso Lua o le vaiaso nei, e faatino le momoli e ala i faaaloaloga faaleaganuu e faafetaia ai le Palemene o Samoa i le faaeaea ua tofia ai se tasi o tamalii o le itumalo le afioga Le La’ulu Tiatia Mapesone, e avea ma se tasi o Sui e to’atolu o le tofiga Sui o le Fono a Sui Tofia.
O le mae’a o taualumaga a le Fono Aoao Faitulafono i le Aso Lua, na afifio ane ai le Palemia ma lana Kapeneta, le Fofoga Fetalai ma sui mamalu uma o le Palemene e tali faaaloaloga maualuluga a le afioga i le Pāpā ma le itumalo, lea sa molimauina e le’i alo tamala le tapenaga i tulaga masani i faaaloaloga a le atunuu e tatala ai ie o auafa ma ie o velevelega aemaise o ie tetele e leo ai laoa ma maota o tupu ma e’e ma faleupolu o le itumalo ona o aso tāua e pei ona iai le Aso Lua i le malae o le faautugatagi a Samoa.
O loo faatino auaua’i faaaloaloga nei e sui o le fono a sui tofia na faatauto i se vaiaso e le’i mamao atu, le afioga i le Le La’ulu Tiatia Mapesone, afioga Tui Atua Tupua Tamasese Efi, ma le afioga i le Tapaau Faasisina susuga Malietoa Moli Malietoa.
