O le tatau Samoa o se tasi lenei o autu o loo faapea ona tele ina faaaogāina e le fanau aoga e faia iai a latou suesuega mo meaaoga e togia ai ma fesoasoani i maka poo togi e faaopoopo i faaiuga o a latou suega i le faaiuga o le tausaga.
O le gasolo ifo o le fanau aoga i le nofoaga o loo faatinoina ai galuega a tufuga ta tatau i tuafale o le fale talimalo a le Pulega o Tagata Maimoa mai Fafo o se faafitauli i le autufuga a o feagai ai ma le galuega.
O le taeao la o le Aso Faraile na a’e ai se tofa i le faatamā o le asosi Malofie ia Su’a Suluape Alaiva’a Petelo ma le asosi a le Malofie ina ia faatino se faaliga a o iai le fanau aoga e silasila ma tapue faamatalaga e fesoasoani lea i le faatinoina o a latou suesuega.
“O le omai ai o le fanau aoga e fai a latou suesuega i le galuega, ua fai ma faalavelave i le taimi o a matou galuega.
“A taunuu mai tamaiti ae lē mafai ona koe faatonu se isi taimi e omai ai ona ou taumafai lea e tali atu i le sāvali a tamaiti nei ae tuu la’u galuega.
“E pei o le itu la lena na iai loa le manatu e sili le aumai uma o fanau aoga i se nofoaga se tasi e faatino ai vaega nei mo latou.”
Na saunoa Sua ua iai nisi o faamatalaga e faatatau i le tatau ua ese lona faamatalaina.
“Sa ou matamata i le TV2 o faaali mai ai le tele o mea ua mimilo ua lē sa’o foi ona tuuina mai mo fanau aoga, ou te lē popole a’u i le tagata matua la e faalogo iai ae o tamaiti nei ma ave sese ai faamatalaga.
“O lo’u manao lena faapea ou te alu i luga o le televise e faamatala vaega e agai i le tatau ae peitai ua ou faapea ifo e sili pe a tuu pea le tagata ia ma ona talitonuga ona ou manatu lea e tapena le faamoemoe lenei e faatatau ma patino lava i fanau aoga.”
E tele aoga na valaaulia mo lenei faamoemoe ae peitai e toaitiiti lava na auai ma na ta’ua e Su’a e faatino lava lenei faamoemoe ona o le vaai lea i le fanau.
“O ituaiga topics ia lea e gālala ai fanau aoga auā o measina a le atunuu e le gata i meatotino o loo faatino ai lenei galuega ma e mafai ona o latou fesoasoani ai i nisi tamaiti aoga i le lumanai.
“Ae aogā tele lenei polokalame mo fanau aoga auā o lea ua iloa atu nei i le taeao e ese talitonuga ia e omai ma nisi o fanau aoga fai mai ai ma ai ae lē o sa’o nei faamatalaga.”
O se popolega lea ia Su’a ma le faatinoina o lenei faiva a le atunuu e pei ona ia saunoa ai.
“O se matuai popolega tele lea ia te au ona o le a fetosoa’i solo ae taatia le faavae sa fausia mai e mātua ua lagomau mai i tiasa.
“E pei la o le tulaga lea sa ou fai atu ai o le galuega o le malofie sa tuu ia Su’a o lona faiva, ae ua faapea mai talitonuga a nisi o tagata, o Su’a o le fai mea faigaluega ae lē o se tufuga ta tatau ae aisea ua faaulu ai ia Su’a faalupega o le aiga tufuga.
“O lo’u popolega la ina ne’i oo atu i se taimi i le lumanai ua sui le faavae lea.”
O loo iai le fuafuaga e faaauauina pea lenei polokalame e pei ona faailoa e Su’a.
“Na matou talosaga i le Konesula a Niu Sila lea la e lagolagoina e latou le faamoemoe lenei a faapea la e oo atu i le tausaga fou ae mafai ona toe fesoasoani mai e toe faatino lenei faamoemoe.”
E ui i le toalaiti o fanau aoga mai Kolisi maualuluga e patino ai lenei polokalame ae o loo maua pea le avanoa e pei ona saunoa Su’a o loo tatala pea le faitotoa i fanau aoga o loo lē mafai ona auai i lenei aso ae mo le taimi o i luma e faatino ai ni a latou suesuega i le malofie.
