E tolu ni faletalimalo ua mae’a ona faia le faatautu’i i le faamasinoga maualuga, ina ua le mafai ona toe faaola tupe na latou aitalafu mai le Faletupe o Atina’e a le Malo.

O ia aitalafu ua faaalia e le taitai o le Malo i le fono ma tusitala ua silia i le 15 tausaga o tuuavanoa iai le faletupe e togitogi atu. O le tasi o faletalimalo tele o loo tapunia pea i le taimi nei o le Aggie Greys i Vaisigano.

O lea faletalimalo na faatau e se faipisinisi mai Asia, ma o loo feagai ma ni faaletonu tau tupe ona sa faatau faatasi ma se nonogatupe e 50 miliona tala mai le Faletupe o Atina’e ae o lea nonogatupe tele sa i lalo o le faamalumaluga a le Malo ma o se aiaiga sa faatino i le taimi o le faigamalo sa iai, a o lei see atu le faigamalo a le Faatuatua i le Atua Samoa ua Tasi.

Ua faaalia e le Palemia le afioga Fiame Naomi Mataafa, o se mataupu lea o loo manaomia le silasila toto’a iai o le Malo i le taimi nei ina ia manino ma malamalama lelei i aiaiga ma auala sa faia ai lea nonogatupe.

Le afioga i le tamaitai Palemia i sona finagalo i le feiloaiga ma tusitala.