I le toe usuia ai o le fono a le Palemene i le taeao analeila na muai faatino ai le faatautoga a le sui faipule fou mo le Itumalo o Vaimauga Nu.3 le afioga Lautimu’ia Afoa Uelese Vaai.
E pei ona silafia o Lautimu’ia lea na manumalo mai i le palota laititi a lenei Itumalo lea sa faatautaia i le vaiaso na tea nei ma o le asō lea na aloaia ai loa ma lona ulufale atu i le Palemene ma sui usufono o upufai o malo.
O lenei tautinoga sa faia i luma o le Fofoga Fetalai ma na molimauina e sui usufono uma o le Palemene.
O Lautimu’ia sa tauva i lalo o le fu’a a le vaega faaupufai a le Faatuatua i le Atua Samoa ua Tasi ma ua oo atu ai nei i le 32 nofoa ua umia e le FAST, ae o le vaega e puipuia aiātatau a tagata (HRPP) o loo agaia le faigamalo e 17 nofoa o loo latou umia ae le gata i lea o sui faipule e toatolu ua faamavae mai lea pati faaupufai lea o loo faatali i se finagalo o le faamasinoga pe talia le latou mau e fia tutu taitoatasi i le Palemene ae le lagolago i se pati faaupufai.
Na faamanino e le Fofoga Fetalai, Papalii Li’o Ta’eu Masipa’u le tāua o lenei valaauina ma ave foi upu faamalosiau i le sui faipule ua faatautō auā lona tulai mai i le tauaveina o le tofi mo lona itumalo.
