O le taeao analeila na molimauina ai e le afioga i le Ao o le Malo, Tuimalealiifano Vaaleto’a Sualauvi II ma lana masiofo, Sui Ao, Le Mamea Ropati Mualia ma lona faletua, Tamaitai Palemia Fiame Naomi Mataafa ma le Kapeneta i le faatautoina o le Peresetene fou o le faamasinoga le afioga ia Lesatele Rapi Vaai. 

Na faia lea faamoemoe i le maota o le Ao Mamalu o le Malo i Vailele ma i le mae’a o le lauina o le tautoga na saini aloaia ai loa e Lesatele le faamaoniga o lona tofi fou. I le sanoaga a le Peresetene fou a le Faamasinoga o Fanua ma Suafa na faailoa ai e Lesatele Rapi Vaai, “O le mau a le toatele o tagata Samoa, o le faamasinoga o Fanua ma Suafa o le faamasinoga lea e pito sili ona tāua i tagata Samoa. Ua ala ona a’e lea manatu ona o le faamasinoga o Fanua ma Suafa lea e iloilo ai measina a afioaga ma aiga. O le mau foi lea sa saunoa iai se tasi o Alii Palemia i lena vaitaimi le afioga ia Tamasese Lealofi e faapea o faaiuga a le faamasinoga o Fanua ma Suafa e aafia ai ē o loo soifua nei ma isi e lei fananau mai”. 

I le tele o faafitauli na tulai mai i tausaga ua tuanai i le Faamasinoga o Fanua ma Suafa e ala i nisi tulafono na pasia ua talitonu le Peresetene e faagalo le tuanai ae agai i luma mo se manuia o le faamasinoga ma Samoa. 

Na ia faafetaia ai foi le Palemia ma le Kapeneta mo le amanaiaina o lona tagata e avea ma Peresetene o le faamasinoga pito sili ona tāua a Fanua ma Suafa. 

“E lē māmā i lo’u nei tagata le tofiga. E leai se tagata e atoatoa e fa’amoemoe i le fesoasoani mai o le Agaga Pāia, e fa’atupu manatu ma musumusu mai mafua’aga lelei ma le amiotonu e soālaupule ai ni fa’ai’uga tonu ma le sa’o. Fa’afetai tele i lau afioga i le Palemia ma le Kapeneta.”