O le taeao nei na faia ai se sauniga faapitoa i le maota o le Ao o le Mālō i Vailele e faatautō ai le Failautusi o le Fono Aoao Faitulafono fou faapea lana sui lagolago ae le gata i lea na faatautō ai ma se tofiga Minisita o le Kapeneta o le a toe atoa ai le 13 o Minisita e aofia ai ma le afioga i le Palemia.
O le sui faipule o Aana Alofi No.4 le afioga Toeolesulusulu Cedric Schuster na faatautō i le asō e toe faaauau lona tofi minisita e pei ona sa uluai filifilia ai ina ua faatautō sui faipule e to’a 26 a le Faatuatua i le Atua Samoa ua Tasi i le Aso 24 o Me. O lea lava foi aso na faalauiloa ai e le tamaitai Palemia Fiame Naomi Mataafa lana kapeneta.
O le Matagaluega o Punaoa Faalenatura ma le Siosiomaga ma le Pulega o Tagata Tafafao na filifilia ai le sui faipule o Aana Alofi No.4 na te vaaia peitai ina ua faia moliaga tau taavale afi a leoleo faasaga i le sui faipule na faamavae ai ma lona tofi Minisita ae tālia taualumaga o ia moliaga o le ave taavale a’o tagofia le ava malosi. I le maea ai o le 4 masina o le Aso Faraile o le vaiaso na tea nei na talia ai e le faamasinoga se talosaga a le Loia a Toeolesulusulu ina ia faapafala moliaga e aunoa ma se faasalaga.
O le susuga ia Leatisa Uitime Tala lea ua faatautoina i le tofi Failautusi o le Fono Aoao Faitulafono ua leva tausaga o avea ma failatusi lagolago ma ua sui tulaga i le susuga ia Tiatia Graeme Tualaulelei.
Taua e le tamaitai Palemia i lana lauga i lea faamoemoe na ave ai lana faamalo i le Minisita fou ma le failatusi o le fono Aoao “O tofiga uma e mai i le Atua ma o pule uma lava ua fai nei e a le Atua ia, ina ia tatou tautua ma auauna ma le loto maualalo”.
O lenei faatautoga na molimauina e sui o le Mālō, o le afioga i le Ao o le Mālō, Sui Ao, o le afioga i le Palemia ma le Kapeneta faapea sui o le Palemene faapea aiga o i latou na faatautoina i le asō.
