E lua aso ua faatautaia ai se fonotaga a sui usufono o le tatou Palemene, o se vaega o taualumaga a le lala o le faalapotopotoga o Palemene a Malo o le Taupulega o loo avea ai Samoa ma sui auai.
Ua faailoa i le pepa o faamatalaga faalauiloa mai le ofisa o le fono aoao faitulafono a Samoa, o le faamoemoe autu o le fonotaga, o se avanoa tāua mo Sui Usufono sa auai i fonotaga eseese a le Faalapotopotoga e folasia ai vaega tāua sa o latou faamauina mai ia fonotaga.
O se avanoa foi mo sui usufono e faasoa ai o latou finagalo i mataupu soofaatasi ma tāua auā le faaleleia atili o faiga faavae faatemokarasi i faiga ma taualumaga faa-Palemene.
O le Faalapotopotoga a Palemene o Malo o le Taupulega (CPA), o se faalapotopotoga faavaomalo e aofia ai Palemene ma Fono Faitulafono o loo galulue faatasi ina ia saga faamausali lona sao atoatoa e atia’e ai tulaga faataatitia aupito i maualuga o pulega malo faatemokarasi ma faiga masani faa-Palemene.
Sa avea aloaia le Fono Aoao Faitulafono a Samoa ma Sui Auai o le Faalapotopotoga i le tausaga e 1970 ma ua tele foi lona sao i tonufai ma fonotaga tetele a le Faalapotopotoga.
O loo faasalalauina tuusa’o lenei fonotaga i luga o le itulau o le fesootaiga o le api o foliga le facebook page a le Palemene o Samoa (livestream).
O le a avanoa foi le fonotaga e auai ai sui o le autusitala ma le aufaasalalau a Samoa, ma ua faamalosia ai foi le tausia o faiga faavae tau faasalalauga a le ofisa o le failautusi o le fono aoao faitulafono faapea ma aiaiga o le tusi taiala mo le auaunaga a le autusitala ma le aufaasalalau a Samoa.
