O lea polokalame soofaatasi na taitaia e le Pulega o Faalavelave faafuasei ma Fuimu poo le FESA sa galulue ai ma le Matagaluega o Leoleo, Falepuipui ma le Toefuata’ina, Ofisa Vaaitau a le Matagaluega o Puna’oa Faalenatura ma le Siosiomaga faapea ma le Faalapotopotoga o Taui mo Faalavelave Faafuasei.

E 10 afioaga na filifilia mai i lenei poloketi ma o le manulauti ina ia faalautele le silafia ma le malamalama o tagatanuu i gaioiga e ao ona faia i taimi o faalavelave e pei o le,

 Faalauiloa o le saogalemu o afi

 Sauniuni a o lei tupu, i le taimi ua tupu ma le mae’a ona tupu o se faalavelave faalenatura

 Saili ma laveai

 Fesoasoani muamua

 Faasaoina ma le puleaina o apitaga

I le mae’a ai o lenei polokalame soofaatasi na mafai ona tufatufaina ai le tele o meafaigaluega e pei o fagu fuimu, maea lavea’i, pulou faigaluega, moliuila, masini faaleotele leo ma ‘ili afi. Ae le gata i lea sa tauaaoina foi tusipasi o lea polokalame. Na momoli ai le faafetai o nisi o pulenuu o afioaga i sui o Matagaluega a le malo na faatautaia lea poloketi tāua ma le lagalaga i mea lelei auā le saogalemu lautele o le atunuu.