Na amata aloaia se polokalame tāua mo le Aso faapitoa o tamā i lenei tausaga i se solo tele na faatino i lumāmaota o le malo i le taeao ananafi ma na molimauina ai le to’atele o tamā o le atunuu sa auai i lea faamoemoe.
I le mae’a ai o lea solo tele na sosoo ai loa ma se polokalame o a’oa’oga na faatautaia e le Matagaluega o Tina ma Tamaitai Atina’e o Nuu ma Agafesootai ma le faamoemoe ina ia faamanatu i tamā le tāua o ta’ita’iga ma faiganuu lelei ae lē gata i lea o lo latou sao tāua i le atina’ega o Samoa.
O le afioga i le Minisita Lagolago a le Matagaluega o Tina ma Tamaitai, Seuamuli Fasi Toma na fai ma sui o le malo e momoli le faafetai i tamā uma o Samoa mo la latou galuega faigata o le avea lea ma ulu o aiga ma taumafai e faamaopoopo pulega a nuu ma faipule i soo se afioaga auā lava le manuia o Samoa.
O se vaega o le saunoaga a le Minisita Lagolago o le Matagaluega o Tina ma Tamaitai Atiina a’e o Afioaga ma Agafesoota’i, le tofa Seuamuli Fasi Toma, i le sauniga e faamanatu ai le Aso o Tamā o Samoa. O le Aso Faraile nei o le a faia ai foi le sauniga lenei mo Tamā o Puleono i Salafai.
