O se faaaloalo maualuga i tu ma aga i fanua a Samoa le ifo toele ma sogi i le palapala poo le eleele e faailo ai o se taulaga ua momoli e faatāua ai sootaga tau gafa o tagata, ma o latou faasinomaga i le siosiomaga faaleaganuu.
O le autu lea o se faaaloalo maualuga na faatino e le afioga i le Tama Aiga le afioga Tui Atua Tupua Tamasese Efi, ina ua tulaueleele i fanua o le Manu’atele poo le Motu Sa, a o iai o ia i Amerika Samoa i se valaaulia na te faia se saunoaga e tapunia aloaia ai le masina atoa o le polokalame a le faigamalo i Sasa’e na faatāua ai le gagana Samoa.
Sa maua se avanoa e fesiligia ai le afioga i le Faatonu o le Komisi o le Gagana Samoa i totonu o Tutuila ma Manu’a e faamatala ai lea faaaloalo maualuga.
O se faatalanoaga na faia i le Aso Lulu o lenei vaiaso, a’o iai i Samoa le Faatonu le afioga Peseta Va’aelua Tialuga Sunia Seloti i ni tuatuano’a faaleaiga.
Se talanoaga ma le Faatonu o le Komisi o le Gagana Samoa a le faigamalo i Amerika Samoa le afioga i le faletua Peseta Vaaelua Tialuga Sunia Seloti.
O loo iai le faamoemoe o le komisi o le gagana Samoa a Tutuila ma Manu’a o le uluai tausaga lenei o le masina o Mati ua avea ma polokalame e faatāua ai le gagana Samoa o le a faaauau pea i tausaga uma.
