Ua faataunuuina nei e saienitisi i le Iunivesite o Aukilani se tasi o suesuega ua faia mo le uluai taimi i le atunuu, e faataitai ai pe mafai ona faaaogā le suavai ua mae’a ona faaaogā, wastewater e mataitu ai le tele o le ava malosi o loo inumia e tagata.

O se tasi lenei o suesuega tele ua faatautaia ma e 10 nofoaga e tapue ai le suavai ma e mafai ona aofia ai le 40 pasene o le faitau aofai o Niu Sila, na faaaogā i lenei suesuega sa faia mo le 6 masina i le tausaga 2021 galulue faatasi ai ma le Institute of Environmental Science and Research.

E fā vaega e tapue ai le suavai faamauina mai Aukilani e aofia ai vaega mai le itu i Matu, Aukilani Tutotonu, Sisifo ma le itu i Saute, lona uiga e amata mai Palmerston North, Wairoa, Dunedin, Quenstown, Westport ma Kalaiesetete.

O le taumafaina o le ava malosi i ia pitonuu sa faamauina ai o tagata e 15 tausaga ma sili atu sa o latou taumafaina le tusa ma le 1.2 o le ava malosi i le aso, ma fai mai le Iunivesite pe a faatusa atu i faamaumauga mai le faalapotopotoga o le Soifua Maloloina i le lalolagi, o loo maualalo.

Ua ta’ua foi e tele atu le ava malosi sa taumafaina i le itu i Saute o le atunuu, nai lo le itu i Matu.

O Aukilani i Saute foi e aupito i laititi ai le ava malosi e tagofia i le piliota e pei ona suesueina ma ua faailoa ai se finagalo o nisi o le ausuesue, atonu o le a faamuta ai ma nisi o mafaufauga pitotasi e masani ai nisi e faapea o tagata Maoli ma Pasefika o ni tagata taumamafa ava malosi tele.

Sa maua foi i le suesuega e mātele ina matauina le tele o le ava malosi e inumia e tagata i le taimi o ni aso faailogaina e pei o aso malolo aemaise o le taimi o ni taaloga lakapi, e lē gata i le iuni, liki ma taaloga kilikiti.

Fai mai ua tele atunuu ua faaaogā le faiga lea e faatino ai suesuega e faatatau i le tele o le ava malosi o loo taumafaina e tagata.