E fesuisuia’i faigamalo mai lea taimi i lea taimi ae tumau pea le tutoatasi o le faatinoga o le tautua a tagata faigaluega uma a le Malo.
O le tasi lea o vaega o le saunoaga a le taitai o le Malo le afioga i le tamaitai Palemia, i le sauniga faalemalo na faatauto ai nisi o faauluuluga, ma ofisa sinia o le aufaigaluega a le malo ua filifilia e tauave le taitaiga o nisi o matagaluega ma faalapotopotoga a le malo.
E pei ona silafia o le mae’a o le palota tele i le tausaga na tea nei, na feagai le faigamalo filifilia ma ni to’a i le ulufale atu e amata faatino lana pulega, ina ua tulai mai ni to’a i le va faafeagai ai ma nisi o faauluuluga o auaunaga a le Malo.
O se to’a na faatoa masuiga mālie ina ua mae’a faamasinoga sa lu’i ai i ni finauga faaletulafono, nisi o mataupu sa fesoua’ina ai le taunuuga o le faiga filifiliga a le atunuu.
E toafitu faauluuluga o nisi o auaunaga a le malo ua faatauto i le tuanai ona faamautu lo latou filifilia e avea ma Ofisa Sili o pulega, ma sa faatauto ai foi ma sui filifilia e toatolu o le pulega o le komisi o galuega a le malo e aofia ai le taitaifono o le komisi, faapea sui o le komiti faufautua o totogi.
1. Dr Mema Motusaga – Ofisa Sili o le Matagaluega Tina ma Tamaitai Atina’e o Afioaga ma Agafesootai
2. Fuimaono Dominic Faatoialemanu Schwalger – Ofisa Sili o Pulega o le Suavai
3. Fui Tupai Mau Simanu – Ofisa Sili o le Matagaluega o Galuega, Felauaiga ma Atina’e Eseese
4. Leota Aliielua Salani – Ofisa Sili o le Fuainumera Faamauina
5. Pativaine Reita Petaia-Tevita – Ofisa Sili o le Pulega o Tagata Tafafao Maimoa Mai
6. Saoleititi Maeva Natacha Betham-Vaai – Ofisa Sili o le Matagaluega o Tupe
7. Tanuvasa Petone Mauga – Komesina o Tineimu ma Faalavelave Faafuasei
O sui o le Komisi o Galuega a le Malo:
Nonu Lemauga Saleimoa Vaai – Taitaifono
Gatoloai Tilianamua Afamasaga
Fonoti Perelini Perelini
E na o le toalua sui o le Komiti Faufautua mo Totogi na faatauto i le sauniga o le faletua le tofa Tuiloma Sina Retzlaff ma le afioga Mua’ausa Joseph Walter, o le taitaifono le afioga Tuala Farani Chan Tung e lei auai ona o loo toesea ma le atunuu.
E iai nisi o faauluuluga fou ua filifilia e lei faatautoina i le sauniga faalemalo i le Aso Lulu ona o loo malaga i fafo i nisi o fonotaga, e pei o le afioga Lefaoalii Unutoa Fonoti, o le Ofisa Sili o le pulega o le matagaluega o fesootaiga ma faamatalaga faatekonolosi, ma le Komesina o Leoleo le afioga Auapaau Logoitino Filipo.
